У гэты дзень хрысціяне ўспамінаюць, як Ісус Хрыстос заехаў у Іерусалім, і прыносяць у дом пухнатыя галінкі вярбы, якія сімвалізуюць вясну, абнаўленне і надзею.
Гісторыя свята бярэ свой пачатак у далёкай Палестыне. Паводле Евангелляў, Ісуса сустракалі як Месію, высцілаючы дарогу пальмавымі галінкамі і ўсклікаючы «Асанна!». У нашых краях, дзе пальмы не растуць, іх замянілі вярбой, якая першай абуджаецца пасля зімовай спячкі.
Нашы продкі верылі, што вярба валодае асаблівай сілай. Яе лічылі абярэгам, сімвалам урадлівасці і ачышчэння. Таму ў Вербную нядзелю яе асвячаюць у царкве, а затым прыносяць дадому. Лічыцца, што галінкі аберагаюць дом ад бед і хвароб.
Вербніца – гэта не толькі рэлігійнае свята, але і выдатная нагода адчуць набліжэнне вясны, парадавацца першым цёплым промням сонца і ўпрыгожыць свой дом.
Самыя цікавыя і важныя навіны шукайце ў нашых сацыяльных сетках: TikTok, Instagram, VK, Одноклассники, Telegram, Facebook, Youtube.
