Напярэдадні Дня памяці воінаў-інтэрнацыяналістаў, які адзначаецца ў Беларусі 15 лютага, на Брагіншчыне ўшанавалі памяць землякоў, якія загінулі ў Афганістана.
Ветэраны-афганцы Валерый Чарнянок і Віктар Балобан, старшыня раённай арганізацыі Беларускага грамадскага аб’яднання ветэранаў Любоў Дзяркач і галоўны спецыяліст галоўнага ўпраўлення па праблемах ліквідацыі наступстваў катастрофы на Чарнобыльскай АЭС Аляксандр Калясан наведалі месцы пахаванняў землякоў, жыццё якіх забрала чужая вайна.
Першым пунктам стала выселенае ў выніку аварыі на ЧАЭС Залессе, дзе знайшоў вечны спакой Віктар Сцепаненка. Ён нарадзіўся ў гэтай вёсцы ў 1960 годзе. Пасля школы і ДТСААФ працаваў вадзіцелем, а 4 кастрычніка 1978 года быў прызваны ва Узброеныя Сілы СССР. Марыў вярнуцца дадому, пра што пісаў родным у апошнім лісце, поўным трывогі і надзеі: «…верце, вельмі верце, што я вярнуся… ». Але 25 снежня 1979 года самалёт, на якім ляцеў радавы Сцепаненка, баец 103-й паветрана-дэсантнай дывізіі, пацярпеў крушэнне ў раёне Кабула.
Наступны прыпынак – Хатуча, таксама выселеная вёска. Тут знаходзіцца магіла Віктара Балобана, які нарадзіўся ў 1965 годзе. З дзяцінства ён захапляўся тэхнікай, а пасля вучылішча працаваў трактарыстам. У 1984 годзе юнака прызвалі ў армію і накіравалі ў Афганістан. 11 лістапада 1984 года яго БМП падарвалася на фугасе падчас разведвальнай аперацыі.
Апошні пункт – Брагін, дзе пахаваны Віталій Кіпцік. Нарадзіўся ён у 1963 годзе. Пасля заканчэння ваеннага вучылішча быў накіраваны ў Афганістан у званні лейтэнанта. 8 снежня 1984 года яго ўзвод трапіў у засаду, і Віталій, камандуючы падраздзяленнем, загінуў.
Усе трое пасмяротна ўзнагароджаны ордэнам Чырвонай Зоркі.
Каля кожнай магілы настаяцель прыхода храма Прэабражэння Гасподняга іерэй Расціслаў Бандарэнка правёў ліцію, узносячы малітвы за спачын душ загінуўшых воінаў.
Самыя цікавыя і важныя навіны шукайце ў нашых сацыяльных сетках: TikTok, Instagram, VK, Одноклассники, Telegram, Facebook, Youtube.
