Аляксандра Стрыжонка ведаюць многія нашы землякі. Таленавіты трэнер-выкладчык па лёгкай атлетыцы ДЮСШ Брагінскага раёна – прыклад для юных спартсменаў, якія мараць аб вялікіх дасягненнях.
Нарадзіўся ён у аграгарадку Лужкі Шаркаўшчынскага раёна Віцебскай вобласці, вучыўся ў мясцовай школе. Пасля заняткаў любіў пабегаць з сябрамі за мячом і проста весела правесці вольны час – дзяцінства было бестурботанае. Тады юнак яшчэ не ведаў, што звяжа свой лёс з лёгкай атлетыкай. Паспрабаваць сябе ў спорце прапанаваў настаўнік фізічнай культуры Мікалай Аляксандравіч Ляўшыцкі.
Педагог не памыліўся. Аляксандр стаў пераможцам і прызёрам шматлікіх спаборніцтваў. На бегавой дарожцы нікому не пакідаў шанцаў.
– У бегу мне падабаецца пачуццё свабоды. У такі момант ты ні пра што не разважаеш, твая галава адпачывае ад пастаяннага патоку думак, – прызнаецца Аляксандр.
Дзякуючы поспехам у спорце ён паступіў у Наваполацкае вучылішча алімпійскага рэзерву, адкуль выйшаў трэнерам па лёгкай атлетыцы.
Падчас вучобы Аляксандр выступаў на спаборніцтвах рознага ўзроўню: ад рэгіянальных да міжнародных. Ён стаў прызёрам і пераможцам Кубкаў і першынстваў Рэспублікі Беларусь па лёгкай атлетыцы, Алімпійскіх дзён моладзі. Асабліва значная для яго – перамога на чэмпіянаце краіны па спартыўнай хадзе.
Нягледзячы на добры тэмп у спартыўнай кар’еры, яе давялося спыніць і змяніць на трэнерскую дзейнасць. Месцам працы стала ДЮСШ Брагінскага раёна. Сюды трэнер прыехаў у 2018 годзе па рэкамендацыі сябра. І адразу заключыў кантракт на пяць гадоў, які нядаўна прадоўжыў на другі тэрмін.
Зараз у Аляксандра займаюцца дзве групы: у адной – дзевяць вучняў, якія трэніруюцца па 90 хвілін тры разы на ты-дзень, у другой – восем: заняткі працягваюцца па 2 гадзіны і 15 хвілін па пяць разоў на тыдзень.
Пачынаюцца трэніроўкі з пытанняў аб самаадчуванні і пажаданнях вучняў. Яго групы – гэта не проста каманда, а сапраўдная сям’я, дзе кожны адчувае сваю важнасць. Вывучаючы тэхніку спрынту і спартыўнай хады, Аляксандр таксама надае ўвагу выпраўленню паставы, што, на яго думку, вельмі важна для маладых спартсменаў.
За поспехамі сваіх вучняў трэнер назірае з гонарам. Яго выхаванцы – прызёры рэгіянальных і абласных спаборніцтваў, спартландый. Акрамя гэтага, яны – удзельнікі рэспубліканскіх стартаў. Адзін з апошніх вынікаў – срэбра адкрытага Кубка вобласці па лёгкай атлетыцы, які праходзіў у снежні. Можна з упэўненасцю сказаць, што імёны юных лёгкаатлетаў Брагіншчыны ўжо становяцца вядомымі па-за яе межамі.
Аляксандр захапляецца падводным паляваннем, любіць прагулкі па вячэрнім райцэнтры, чытае мастацкую літаратуру. Дарэчы, падзяліўся ўражаннямі ад рамана англійскага пісьменніка Уілкі Колінза «Дзяўчына ў белым». Кніга захапляе з першых старонак.
– Сюжэт падаецца ў форме запісаў, якія вядуць розныя персанажы ад свайго імя, або расказваецца гісторыя, звязаная з героямі апавядання. Галоўны з іх – Уолтар Хартрайт, мастак, які, дзякуючы свайму сябру-італьянцу, уладкоўваецца настаў-нікам у багаты маёнтак. Па дарозе туды ён дапамагае таямнічай жанчыне, апранутай у белае, якая хоча таксама трапіць у маёнтак Фэрлі, – раскрывае падрабязнасці кнігі Аляксандр.
Абмяркоўваючы мэты, трэнер дзеліцца планамі аб завяршэнні рамонту і стварэнні ўтульнасці ў кватэры. А адна з самых вялікіх яго амбіцый – выхаваць чэмпіёна краіны і выйсці на міжнародную арэну. Што ж, жадаем поспехаў!
Самыя цікавыя і важныя навіны шукайце ў нашых сацыяльных сетках: TikTok, Instagram, VK, Одноклассники, Telegram, Facebook, Youtube.
