У скарбонку раёна юныя таленты дадалі два дыпломы трэцяй ступені. Дзесяцікласніца Ангеліна Махнач вызначылася ў біялогіі, а дзевяцікласнік Вадзім Шульга – у геаграфіі.
Ангеліна расказала, што да ўдзелу ў алімпіядзе яна рыхтуецца з сёмага класа. І гэта не першы яе дыплом на абласным узроўні. У восьмым класе гімназістка таксама заваявала трэцяе месца. У гэтым ёй дапамагае настаўніца хіміі і біялогіі Наталля Іванаўна Тарасевіч. Педагог расказала, што Ангеліна – дзяўчына творчая, ініцыятыўная і старанная:
– Калі яна захоча чаго-небудзь дасягнуць, то абавязкова гэта зробіць. Прычым не толькі ў біялогіі, але ў жыцці. Ангеліна – пераможца шматлікіх конкурсаў, яе працавітасці можна пазайздросціць. Дзяўчына шмат займаецца дадаткова, у тым ліку самастойна. Такі падыход да справы і дае свой плён.
Гімназістка расказала, што ў дзень алімпіяды хваляванне прысутнічала, але дзяўчынкі, якія былі побач, падтрымлівалі яе.
– Здаецца, у той час яны верылі ў мяне і мае схільнасці больш, чым я сама, – дадае Ангеліна.
Яна прызналася, што цікавасць да біялогіі натхніла яе разгледзець прафесію ўрача. Вучаніца марыць звязаць сваё жыццё з медыцынай.
А вось Вадзім Шульга пакуль з будучай прафесіяй дакладна не вызначыўся. У яго на гэта ёсць яшчэ два гады, а пакуль ён працягвае паглыбляцца ў геаграфію. Гэты прадмет яго зацікавіў яшчэ ў шостым класе, калі маці прапанавала паўдзельнічаць ў алімпіядзе. Дарэчы, маці юнака – Наталля Мікалаеўна Шульга – настаўніца геаграфіі ў Малейкаўскай сярэдняй школе. Таму, акрамя дадатковых заняткаў у гімназіі з Сяргеем Уладзіміравічам Паплаўным, ён займаецца і дома.
Вадзім расказвае, што ў дзень алімпіяды ён увогуле не хваляваўся, юнак ён стрыманы. Але трэці тур быў для яго больш складаны, чым два папярэднія.
– У трэцім этапе рэспубліканскай алімпіяды мы праходзілі ўсе тры туры: тэарытычны, мультымедыйны і практычны. Калі ў першым трэба нешта апісаць, у другім – прайсці тэставую частку, то ў трэцім – прааналізаваць графікі і карты. Тут, акрамя ведаў, патрэбны і аналітыка, і логіка. Каб мець поспех на алімпіядах, варта быць усебакова развітым, – заключае Вадзім.
Самыя цікавыя і важныя навіны шукайце ў нашых сацыяльных сетках: TikTok, Instagram, VK, Одноклассники, Telegram, Facebook, Youtube.
