Удзел у іх прынялі чатыры каманды, кожная з якіх згуляла па тры матчы.
У першым туры ў барацьбе сышліся зборныя Камарына і лясгаса. Абедзве каманды біліся за кожны мяч, паказваючы высокі ўзровень гульні. Аднак перавага была на баку футбалістаў лясгаса (3:0). Спартсменам з Камарына не хапіла згуртаванасці і рэалізацыі момантаў.
Другі матч быў не менш захапляльны. «Легіён» сустрэўся з Брагінскай ЦРБ. Напружанне ў гульні трымалася да апошніх секунд, гэта адлюстраваў і вынік – першыя не змаглі «распячатаць» вароты сапернікаў і прайгралі з мінімальным лікам 0:1. Варатар ЦРБ дадаў у сваю скарбонку «сухар». Дарэчы, другі ў турніры, першы на рахунку Пятра Сачанкі (лясгас).
Гульня паміж Камарыном і «Легіёнам» стала выпрабаваннем для першых. Мяч за мячом яны саступалі сваім сапернікам, і гэта нягледзячы на тое, што футбалісты «Легіёна» гулялі другі матч запар. Як вынік – паражэнне (1:6).
Няўдалымі выдаліся і дзве апошнія гульні для Брагінскай ЦРБ. У напружанай барацьбе яны саступілі спачатку лясгасу (2:4), затым – Камарыну (2:4). Аднак гэта не перашкодзіла ім заняць выніковае трэцяе месца.
Фінал турніру выдаўся насто-лькі напружаным, што гледачы трымалі позіркі на мячы, не адрываючыся ні на секунду. За галоўны прыз – кубак імя П. Шпетнага – змагаліся «Легіён» і Камарынскі лясгас. Кожная каманда была нацэлена на перамогу, што і дэманстрававала на полі. Усё вырашылі апошнія секунды – лепшымі сталі футбалісты лясгаса (1:2), бронзу турніру заваявалі спартсмены Брагінскай ЦРБ, срэбра – у «Легіёна».
Як адзначыў старшы інспектар райвыканкама Юрый КРЫВАРУЧКА, пераможцай стала каманда, у складзе якой амаль усе футбалісты ва ўзросце за 30 гадоў:
– Яны заслужылі перамогу ўпартай працай! Хачу звярнуць увагу на тое, што ўзровень гульні ў Брагінскім раёне вырас. Павысілася і цікавасць да гэтага віду спорту, што вельмі радуе.
Яшчэ адна адметнасць турніру – удзел у ім моладзі. Спартсмены, якія гуляюць за прафесійныя каманды, знаходзяць час і прыязджаюць на малую радзіму, каб узмацніць мясцовыя дружыны.
Варатар каманды-перамо-жцы Пётр САЧАНКА падкрэсліў, што правядзенне падобных турніраў натхняе моладзь на заняткі спортам, а таксама нацэльвае на здаровы лад жыцця.
– Мы імкнёмся прымаць удзел у падобных спаборніцтвах. Летась занялі трэцяе месца, сёлета рыхтаваліся паказаць свой лепшы футбол. Перамогу здабылі ва ўпартай барацьбе, гулялі як адзіны згуртаваны механізм. Хацелася б падзякаваць камандзе за перамогу, арганізатарам – за такі выдатны турнір, а сапернікам – за годную і прыгожую гульню. Заўсёды з радасцю прымаю прапанову ад таварышаў пагуляць у футбол у родных сценах на любым узроўні, – адзначыў Пётр.
Самыя цікавыя і важныя навіны шукайце ў нашых сацыяльных сетках: TikTok, Instagram, VK, Одноклассники, Telegram, Facebook, Youtube.