Сёння Брагіншчына прымала ўдзельнікаў пастаяннай камісіі Гомельскага абласнога Савета дэпутатаў па аграрных пытаннях, экалогіі і праблемах пераадолення наступстваў катастрофы на ЧАЭС.
У цэнтры іх увагі была сістэма работы з маладымі спецыялістамі, якія прыступілі да працы па размеркаванні.
У мерапрыемстве прынялі ўдзел старшыня камісіі Дзмітрый Старасценка, старшыня Брагінскага раённага Савета дэпутатаў Іна Міхаленка, намеснік старшыні райвыканкама Раман Цеслянок і дэпутаты Гомельскага абласнога Савета дэпутатаў.
У пачатку сустрэчы Раман Міхайлавіч пазнаёміў прысутных з мінулым і сучаснасцю Брагіншчыны, яе адметнасцямі. Ён адзначыў, што раён славіцца сваімі культурнымі традыцыямі, прыродай і галоўнае – людзьмі.
Каб пераканацца ў гэтым, госці накіраваліся ў Брагінскую сярэднюю школу. Час дарэмна не гублялі – па дарозе дырэктар дзіцячай школы мастацтваў Надзея Мялешка расказала і паказала, як раней выглядаў райцэнтр.
Ва ўстанове адукацыі прысутных чакала сустрэча і адкрыты дыялог з маладымі спецыялістамі. Аб тым, на якую падтрымку ад дзяржавы яны могуць разлічваць, паведаміла начальнік аддзела адукацыі райвыканкама Наталля Даўжанок. А маладыя педагогі падкрэслілі, што для працы і камфортнага жыцця ў Брагіне створаны ўсе ўмовы. Гэта добры старт для самарэалізацыі.
Пасля размовы з настаўнікамі дэпутаты накіраваліся ў Брагінскую ЦРБ. Галоўны ўрач Ігар Кірэня правёў экскурсію па ўстанове. Завіталі і да маладых спецыялістаў, з якімі паразмаўлялі пра ўмовы працы і забеспячэнне жыллём. Ігар Яўгеньевіч расказаў, што іншагароднія хутка атрымліваюць кватэру ці пакой у інтэрнаце, за што падзякаваў заканадаўцам. Аднак ёсць праблемы ў тых, чые бацькі пражываюць у райцэнтры. Галоўны ўрач папрасіў Дзмітрыя Старасценку паспрыяць вырашэнню дадзенай праблемы.
Наступны прыпынак дэлегацыі – дзіцячая школа мастацтваў. Надзея Мялешка расказала пра неабходнасць паслядоўнага і комплекснага падыходу да замацавання маладых спецыялістаў на першым працоўным месцы. А таксама пазнаёміла гасцей з моладдзю, якая сёлета прыйшла да іх на працу.
Завяршылася сустрэча пасяджэннем камісіі. Пра сістэму работы з маладымі спецыялістамі гаварыў намеснік старшыні райвыканкама Раман Цеслянок. Намеснік старшыні маладзёжнага савета пры Брагінскім раённым Савеце дэпутатаў Мікіта Велігура зазначыў:
– Мы ганарымся тым, што ў мінулым годзе было падпісана міжнароднае пагадненне аб супрацоўніцтве і ўзаемадзеянні з маладзёжным саветам Чэхава (РФ). Гэта дазволіла нам абмяняцца вопытам і ідэямі. Варта адзначыць, што прадстаўнікі суседняй краіны двойчы наведалі наш раён, што стала значным укладам у работу з маладымі кадрамі. Зараз наладжваем кантакт з маладзёжным саветам Караганды (Казахстан). Мяркую, гэта супрацоўніцтва таксама прынясе станоўчыя вынікі.
Дзмітрый Старасценка адзначыў, што выпрацаваная сістэма работы з маладымі спецыялістамі ў Брагінскім раёне – годны для пераймання прыклад.
Самыя цікавыя і важныя навіны шукайце ў нашых сацыяльных сетках: TikTok, Instagram, VK, Одноклассники, Telegram, Facebook, Youtube.
