Дзявятага кастрычніка мы адзначаем Сусветны дзень пошты. І гэта добрая нагода больш даведацца аб дзейнасці тых, хто забяспечвае сувязь паміж людзьмі.
Гісторыя пошты налічвае некалькі тысячагоддзяў. Першыя службы з’явіліся ў Старажытным Рыме, але сучасная пошта, якой мы яе ведаем, пачала фарміравацца толькі ў XVIII стагоддзі і паступова стала неад’емнай часткай жыцця грамадства.
Сёння, нягледзячы на імклівае развіццё тэхналогій, галіна па-ранейшаму адыгрывае значную ролю. А яе работнікі – гэта не проста людзі, якія адпраўляюць і дастаўляюць карэспандэнцыю. Іх абавязкі значна пашырыліся, і выконваюць іх яны пры любых умовах і надвор’і.
Асаблівасці прафесіі
Менавіта паштальёны ведаюць усе адрасы і нават звычкі сваіх кліентаў. Яны з’яўляюцца пасрэднікамі, якія дапамагаюць людзям заставацца на сувязі, а часам – і вырашаюць праблемы. «Я заўсёды кажу, што паштальён – гэта не проста праца, гэта стыль жыцця», – расказвае Ларыса Змітручэня, якая працуе ў гэтай сферы амаль 20 гадоў.
Працоўны дзень Ларысы Пятроўны пачынаецца ў 9.30 і працягваецца да «пакуль усё не разнясеш». Спачатку яна прымае і сартыруе газеты і часопісы, пазначае тыя аб’екты, якія абслугоўвае на сваім участку. Затым афармляе спецыяльную форму і распісвае выданні па маршруце руху. Апошні распланаваны так, каб не губляць дарма час, па некалькі разоў праходзячы адно і тое ж месца. Потым жанчына разбірае пісьмы. Некаторыя з іх – заказныя і патрабуюць афармлення паведамленняў, таму на стале вырастаюць кіпы паперак. У строгім парадку яна кладзе частку іх у спецыяльную сумку. З ёй за змену паштальён праходзіць не адзін кіламетр, бо адлегласць вялікая: вуліцы Кааператыўная, Крылова, Чалідзе, Скарахода, Палеская, Новая і інш.
Па тым, як зацікаўлена Ларыса Пятроўна расказвае пра свае абавязкі, заўважаю: сваю прафесію любіць. Адзначае: камунікацыя з людзьмі і дапамога ім – прыярытэты ў рабоце.
Пераход у лічбавы век
Сёння пошта не толькі захоўвае традыцыйныя метады, але і актыўна выкарыстоўвае сучасныя тэхналогіі. За апошнія гады тут укаранілі мноства лічбавых сэрвісаў: адсочванне пасылак у рэжыме рэальнага часу, мабільныя дадаткі для адпраўкі пісем і нават магчымасць накіроўваць дакументы анлайн.
Вікторыя Вашчанка, начальнік аддзялення паштовай сувязі Брагіна, адзначае:
– Цыфравізацыі – гэта новы выклік. Мы павінны адаптавацца, а наша праца становіцца яшчэ цікавей. Мы не губляем сваіх пазіцый, выкарыстоўваючы новыя інструменты. Асаблівую папулярнасць на Брагіншчыне набыў «Мабільны паштальён». З’явіўся дадатак адносна нядаўна – у снежні 2020 года. Ён замяняе стацыянарны аб’ект паштовай сувязі, што асабліва актуальна для абслугоўвання жыхароў малых і аддаленых населеных пунктаў.
Дзякуючы дадатку супрацоў-нік можа абслужыць чалавека дома з дапамогай апаратна-праграмнага комплексу (АПК) «Мабільны паштальён». Асноўныя яго плюсы – мабільнасць, кампактнасць, поўная аўтаматызацыя плацяжоў. Гэта сапраўды перадавая навінка для спажыўца. А зручнасць у тым, што, не заходзячы на пошту, вы можаце разлічыцца па карце, аформіць падпіску, аплаціць «камуналку» і любую іншую паслугу з АІС «Разлік» у АРІП, прыняць на даму паштовае адпраўленне або зрабіць грашовы перавод, атрымаць пенсію, купіць спажывецкія тавары і паштовую прадукцыю. Паслугі можна аплаціць як наяўнымі грашыма, так і з дапамогай банкаўскіх плацёжных картак.
Галоўная каштоўнасць
Нягледзячы на ўсе змены, галоўнай каштоўнасцю пошты застаюцца людзі. Нават у век лічбавых тэхналогій, калі паведамленні могуць дасягаць атрымальніка за лічаныя секунды, асабістае ўзаемадзеянне з кліентамі з’яўляецца важным.
Работа ў аддзяленнях паштовай сувязі – гэта яшчэ і ўвага да людзей, чалавечнасць, магчымасць дапамагаць.
Самыя цікавыя і важныя навіны шукайце ў нашых сацыяльных сетках: TikTok, Instagram, VK, Одноклассники, Telegram, Facebook, Youtube.
