Гэта свята было ўстаноўлена ў 2001 годзе, а дата – невыпадковая. Менавіта ў гэты дзень у 1922 годзе была заснавана Нацыянальная бібліятэка імя Уладзіміра Леніна. Грунтавалася яна на фондах, сабраных для бібліятэкі Беларускага дзяржаўнага ўніверсітэта, а таксама атрымлівала кнігі ад найбуйнейшых кнігасховішч Савецкага Саюза.
Да пачатку Вялікай Айчыннай вайны бібліятэка займала сёмае месца ў СССР па колькасці і каштоўнасці экзэмпляраў і ўваходзіла ў лік 30 лепшых кнігасховішч свету. Да 1941 года ў ёй налічвалася больш за 2 мільёны кніг, а колькасць пастаянных чытачоў перавышала 15 тысяч.
Аднак падчас вайны 80% кніжнага фонду было знішчана або вывезена. Зноў адчыніла дзверы для чытачоў установа ў кастрычніку 1944 года, неўзабаве пасля вызвалення Мінска.
Сёння ў Нацыянальнай бібліятэцы Беларусі даступныя больш за 9 мільёнаў кніг і 3 мільёны перыядычных выданняў. Яна таксама захоўвае прыкладна 70 тысяч рэдкіх старадрукаваных кніг і рукапісаў.
Аднак гісторыя бібліятэк у Беларусі значна старэйшая. Першыя кнігі на тэрыторыі краіны з’явіліся яшчэ ў 11 стагоддзі, і першапачаткова яны ствараліся пры царквах і манастырах. Самай старажытнай лічыцца бібліятэка Полацкага Сафійскага сабора. Першая ж публічная ў Беларусі была адкрыта ў 1830 годзе ў Гродне. У цяперашні час у краіне налічваецца каля трох тысяч кнігасховішчаў, якія адыгрываюць важную ролю ў павышэнні культурнага ўзроўню і інфармаванасці насельніцтва.
У сучасным свеце бібліятэкі захоўваюць сваю значнасць. Асабліва у невялікіх населеных пунктах, дзе яны выступаюць як культурныя і адукацыйныя цэнтры. Работнікі бібліятэк Брагіншчыны з цяплом і клопатам ставяцца і да дарослых чытачоў, і да дзяцей, ствараючы ўтульную і інтэлектуальную атмасферу для ўсіх аматараў кніг.
Тут рэгулярна праводзяцца выставы, якія знаёмяць чытачоў з новымі выданнямі, актуальнымі тэмамі і творчасцю мясцовых аўтараў. Акрамя таго, бібліятэкары арганізоўваюць сустрэчы з пісьменнікамі, на якіх кожны жадаючы можа паўдзельнічаць у жывым дыялогу з аўтарамі, задаць ім пытанні і пачуць унікальныя гісторыі аб творчым працэсе. Гэта выдатная магчымасць паглыбіцца ў свет літаратуры і атрымаць новыя ўражанні.
Круглыя сталы збіраюць кампетэнтных спецыялістаў на абмеркаванне актуальных тэм і абмен думкамі. Для дзяцей і моладзі арганізуюцца майстар-класы і віктарыны, якія не толькі забаўляюць, але і навучаюць, дапамагаюць даведацца пра літаратуру, і развіваюць творчыя здольнасці.
Ёсць у населеным пункце бібліятэка – значыць ёсць культурны цэнтр, які аб’ядноўвае людзей розных узростаў і інтарэсаў, прыцягвае разнастайнасцю мерапрыемстваў, прафесіяналізмам супрацоў-нікаў і любоўю да кніг.
Самыя цікавыя і важныя навіны шукайце ў нашых сацыяльных сетках: TikTok, Instagram, VK, Одноклассники, Telegram, Facebook, Youtube.
