Да летніх канікулаў раённы дом культуры традыцыйна рыхтуе змястоўную і насычаную праграму для дзяцей. Працуюць і аб’яднанні па інтарэсах. Сёлета, напрыклад, сапраўдным хітом стаў гурток «Мыльныя бурбалкі».
Заняткі праходзяць два разы на тыдзень, і на іх дзяўчынкі вучацца вырабляць мыла і скрабы. Гэта не толькі займальна, але і карысна, дапамагае развіваць крэатыўнае мысленне. За час летніх канікул гуртоўцы паспелі стварыць некалькі відаў мыла з натуральнымі дадаткамі і скрабы з экзатычнымі водарамі. Гатовая прадукцыя радуе як дзяцей, так і іх бацькоў.
Як расказала Наталля СЫЦЯНОК, метадыст аддзела арганізацыйна-метадычнай работы, працэс вырабу мыла просты. Ён складаецца з трох этапаў. Па-першае, патрэбна растапіць мыльную аснову ў мікрахвалёўцы або на паравой лазні. Тут важна не перамешваць, бо гэта прывядзе да насычэння масы бурбалкамі паветра. Па-другое, у добра разагрэтую аснову трэба ўліць араматычныя дадаткі і пігменты, пасля чаго добра змяшаць для раўнамернага размеркавання водару. Праз некалькі хвілін сумесь становіцца цвёрдай, таму дзейнічаць трэба хутка. Апошні крок – разліў гатовай масы ў падрыхтаваныя загадзя формы. Заліваць варта як мага бліжэй да краю, не асцерагаючыся пашырэння мыла пры застыванні, на якое патрэбна не менш чым гадзіна. Наталля Аляксееўна адзначае, што пэўную колькасць прадукцыі яны пакідаюць для продажу, а некаторыя вырабы дзеці забіраюць дамоў.
Вучаніцы Брагінскай школы з задавальненнем падзяліліся сваімі ўражаннямі ад такой занятасці. Ірына Васільева, напрыклад, наведвае гурток «Мыльныя бурбалкі» амаль год. Пра яго даведалася ад сябровак, якія таксама тут займаюцца. А створаныя сваімі рукамі вырабы дорыць бацькам ці старэйшай сястры.
Аліна Калясан заўважае, што Наталля Аляксееўна нікога не пакідае без увагі:
– Яна падтрымлівае ўсе нашы ідэі, прапануе эксперыментаваць з водарамі і фарбамі, што робіць кожны занятак унікальным.
Вікторыя Кавальчук і Бажэна Мышэйка лічаць, што кожны занятак – гэта не толькі веды, але і сустрэчы з сябрамі. Разам яны ствараюць нешта асаблівае, і ўсе з нецярпеннем чакаюць наступнай сустрэчы, каб акунуцца ў працэс творчасці.
Дзеці з захапленнем прыходзяць у РДК, абмяркоўваючы паміж сабой, якое мыла будуць рабіць на гэты раз. А супрацоўнікі раённага дома культуры адзначаюць, што ў жніўні школьнікаў чакае шмат цікавых мерапрыемстваў.
Самыя цікавыя і важныя навіны шукайце ў нашых сацыяльных сетках: TikTok, Instagram, VK, Одноклассники, Telegram, Facebook, Youtube.
