У эпоху лічбавых тэхналогій, калі кнігі саступаюць свае пазіцыі аўдыёвізуальнаму кантэнту, супрацоўнікі Брагінскай цэнтральнай раённай бібліятэкі імкнуцца стварыць для сваіх чытачоў прастору, у якой літаратура і камунікацыі – асноўныя складальнікі паўсядзённага жыцця.
Тут рэгулярна арганізоўваюцца выставы. Яны, прысвечаныя вядомым аўтарам або пэўным жанрам, суправаджаюцца лекцыямі і дыскусіямі, што робіць працэс пазнання больш займальным. Напрыклад, на мінулым тыдні чытачоў зацікавіла выстава «85 гадоў на абароне Айчыны», прымеркаваная да Дня дэсантнікаў і сіл спецыяльных аперацый.
Традыцыйнымі сталі тэматычныя гутаркі, дзе абмяркоўваюцца актуальныя сацыяльныя і культурныя тэмы. Яны прыцягваюць увагу не толькі аматараў літаратуры, але і ўсіх, хто хоча пашырыць свой кругагляд. На такіх сустрэчах пануе атмасфера ўзаемнай зацікаўленасці.
Запрашаюць у бібліятэку і сучасных беларускіх пісьменнікаў. У Брагіне пабывалі Наталля Касцючэнка, Аксана Хвашчэўская, Якаў Анапрэенка і інш. Дзякуючы такой ініцыятыве мясцовыя жыхары маюць магчымасць пагутарыць з літаратарамі, задаць ім пытанні і даведацца пра творчыя працэсы з першых вуснаў. Сустрэчы выклікаюць жывую цікавасць у наведвальнікаў, асабліва моладзі, якая шукае новыя формы самавыяўлення і крыніцы натхнення.
Для ўзаемадзеяння з аўдыторыяй бібліятэкары актыўна выкарыстоўваюць і лічбавыя платформы. Сацыяльныя сеткі становяцца важным інструментам для анансавання мерапрыемстваў, а таксама для абмеркавання кніг і абмену думкамі паміж чытачамі. Супрацоўнікі актыўна праводзяць конкурсы, апытанні і віктарыны, што дазваляе ахапіць больш шырокую аўдыторыю і падтрымліваць цікавасць да чытання. У іх акаунтах можна знайсці кантэнт не толькі інфармацыйнага, але і гумарыстычнага характару. Гэта выклікае жаданне падпісацца, націснуць на смайл, а ў каго і апынуцца ў чытальнай зале.
Для тых, хто лічыць, што кнігі – гэта «перажытак мінулага», адзначу: яны заўсёды сучасныя. Больш за тое, зараз самы час паказаць, што кнігі па-ранейшаму могуць аб’ядноўваць людзей, натхняць іх на абмеркаванні і з’яўляцца крыніцай новых ідэй.
Самыя цікавыя і важныя навіны шукайце ў нашых сацыяльных сетках: TikTok, Instagram, VK, Одноклассники, Telegram, Facebook, Youtube.
