Сабраць дзіця ў школу – гэта адначасова і радасць, і клопат. З набліжэннем навучальнага года бацькам трэба не толькі закупіць сшыткі і ручкі, але і набыць дзіцяці поўны камплект адзення і абутку. Асабліва гэта няпростая задача, калі ў сям’і некалькі дзяцей, кожны з якіх мае патрэбу ў новым школьным гардэробе.
У такія моманты на дапамогу прыходзяць грамадскія арганізацыі, прафсаюзы і неабыякавыя грамадзяне, якія імкнуцца падтрымаць дзяцей, якія знаходзяцца ў сацыяльна небяспечным становішчы, выхоўваюцца ў мнагадзетных і няпоўных сем’ях, з’яўляюцца сіротамі ці інвалідамі.
Дзеля гэтага ў Беларусі традыцыйна арганізоўваецца дабрачынная акцыя «Збяры партфель першакласніку». Як расказала дырэктар раённага сацыяльна-педагагічнага цэнтра Наталля Корань, стартуе марафон першага жніўня і працягнецца да канца месяца.
– Удзел у акцыі могуць прыняць кіраўнікі, працоўныя калектывы, прадпрымальнікі і неабыякавыя жыхары. Усе сабраныя школьныя прыналежнасці будуць перададзеныя дзецям вышэйпералічаных катэгорый, – дадае Наталля Сяргееўна.
Такія ініцыятывы паказваюць, што наша грамадства аб’ядноўваецца дзеля агульнай мэты – падтрымаць дзяцей і даць ім магчымасць пачаць іх першы навучальны год з радасным настроем. Усе разумеюць: чужых дзяцей не бывае, і кожны з нас у адказе за падрастаючае пакаленне.
Прыняць удзел у дабрачыннай акцыі можа любы жадаючы. За больш падрабязнай інфармацыяй звяртайцеся па тэлефоне 3-91-86.
Самыя цікавыя і важныя навіны шукайце ў нашых сацыяльных сетках: TikTok, Instagram, VK, Одноклассники, Telegram, Facebook, Youtube.
