Першыя дні лета. Прывітанне, свежае паветра, яркае сонца і водная гладзь! Адпачываць дык адпачываць: у кампаніі з прыродай, на маляўнічым беразе возера ці ракі. Але купацца – толькі там, дзе дазволена. У абсталяваных месцах.
Яшчэ, здаецца, зусім нядаўна аб добраўпарадкаванай зоне на беразе Брагінкі жыхары і госці райцэнтра маглі толькі марыць. А сёння гэта адзін з афіцыйных пляжаў: у поўнай «экіпіроўцы» сустракае адпачывальнікаў другі купальны сезон.
Да паслуг – шэзлонгі, ценявы навес, сталы з лавамі, кабінка для пераапранання. Адведзена пляцоўка для гульні ў валейбол, месца для стаянкі аўтамабіляў. Ёсць туалет і два кантэйнеры для смецця, якое рэгулярна вывозіцца. Падвезены пясок. Свежыя колеры фарбаў і належны стан усяго абсталявання сведчаць: падтрымліваецца ў парадку. «Усё гэта – вынік сумесных намаганняў райвыканкама, КЖУП «Брагінскае», Камарынскага лясгаса, запаведніка, прадпрыемства меліярацыйных сістэм, філіяла «Брагінскі» ААТ «Палессебуд», ААТ «Брагінаграсэрвіс», – заўважае начальнік аддзела ЖКГ, архітэктуры і будаўніцтва райвыканкама Данііл Сіманенка.
На асаблівым кантролі, як і належыць, пытанні бяспекі. Каб купальшчыкам нічога не пагражала, вадалазы напярэдадні лета абследавалі і ачысцілі ад пабочных прадметаў рачное дно. На беразе – інфармацыйны стэнд з жыццёва важнымі правіламі, а на блакітнай акваторыі – буйкі, заплываць за якія забаронена. Арганізавана работа службы выратавання на водах.
У размову з аматарамі адпачынку на прыродзе часта ўступаюць прадстаўнікі праваахоўных органаў, раённага аддзела па надзвычайных сітуацыях, камісіі па справах непаўналетніх. Тлумачаць і папярэджваюць, закранаюць самыя важныя аспекты бяспекі: ад пільнага прыгляду за дзецьмі, у якіх зараз канікулы, да падтрымання парадку ў грамадскіх месцах.
Зразумела, што галоўнае правіла на вадзе – асцярожнасць, прадбачлівасць і разумныя паводзіны. Ніякага свавольства і спіртнога! А купанне ў неабсталяваных для гэтага месцах – справа рызыкоўная. І да таго ж пагражае адміністрацыйнай адказнасцю: штраф – ад адной да трох базавых велічынь.
Валянціна БЕЛЬЧАНКА
Фота Цімафея МІХАЛЕНКІ
Самыя цікавыя і важныя навіны шукайце ў нашых сацыяльных сетках: TikTok, Instagram, VK, Одноклассники, Telegram, Facebook, Youtube.
