Гульня праводзілася ў рамках чэмпіянату Гомельскай вобласці па футболе сярод мужчынскіх каманд другой лігі.
Пачатак выдаўся напружаным, футбалісты стваралі небяспечныя моманты каля варот сапернікаў. Аднак большую частку часу ў абароне правялі нашы землякі. Прасеўшы ў зоне, на 22-й хвіліне яны прапусцілі першы гол у свае вароты. Адчуўшы перавагу ў ліку, прадстаўнікі Светлагорску ўсё часцей стваралі галявыя моманты ў зоне саперніка. Як вынік – праз дзесяць хвілін брагінчане вымалі другі мяч са сваіх варот. Яшчэ праз такі ж адрэзак часу – трэці гол на рахунку светлагорцаў. Аднак адпускаць на перапынак гасцей, не распячатаўшы вароты, землякі не хацелі. Таму на апошніх секундах ім удалося змяніць лік на 1:3.
Другі тайм каманды пачалі з асцярожнай, але не менш цікавай гульні. Ажывіліся і балельшчыкі на трыбунах, скандзіруючы «Брагін, наперад!». Нашы футбалісты дастойна змагаліся з сапернікамі. Аднак на 63-й хвіліне чарговы мяч трапіў у нашы вароты. Негледзячы на частыя выхады ў зону абароны светлагорцаў, забіць гол не атрымалася. У гэты дзень фартуна была на баку гасцей. Менш чым за 20 хвілін да канца матча яны закінулі яшчэ два мячы. Выніковы лік – 1:6.
Саступіўшы ў другой гульні, брагінчане ў сваёй групе «Цэнтр» займаюць пятую пазіцыю, ніжэй – Жлобін і Лоеў. Наступны матч у чэмпіянаце яны згуляюць у Акцябрску з камандай гаспадароў у нядзелю, 25 мая.
Самыя цікавыя і важныя навіны шукайце ў нашых сацыяльных сетках: TikTok, Instagram, VK, Одноклассники, Telegram, Facebook, Youtube.
