У Брагіне 9 мая адзначылі Дзень Перамогі. Традыцыйнымі сталі ў гэты дзень і спартыўныя спаборніцтвы. На раённым стадыёне адбыўся турнір па футболе на кубак імя Героя Савецкага Саюза Пятра Жукава, ураджэнца вёскі Мікулічы.
У барацьбе сышліся тры каманды: «Легіён», «Дублін» і Камарынская сярэдняя школа імя П. І. Шпетнага.
У першым матчы змагаліся «Дублін» і «Легіён». Гульня выдалася напружанай, ніхто не хацеў саступаць да апошняй секунды. За 90 хвілін каманда «Дублін» забіла два галы, а ў «Легіёна» не атрымалася распячатаць вароты свайго саперніка. Як вынік – перамога першых.
Пасля перапынку «Легіён» зноў сышоўся ў барацьбе за кубак, але ўжо з Камарынскай СШ. У першым тайме каля варот «Легіёна» было тры небяспечныя моманты, аднак у варотах мяч не пабываў. І, як кажуць, «не забіваем мы, забівае сапернік»: на рахунку «Легіёна» тры галы. Напрыканцы прадстаўнікам Камарынскай СШ удалося распячатаць вароты сапернікаў і зрабіць выніковы лік 3:1.
У апошнім матчы змагаліся «Дублін» і Камарынская СШ. Мацнейшымі былі першыя (5:2). Яны ж і сталі ўладальнікамі кубка П. Жукава. Сярэбраным прызёрам стаў «Легіён», бронза – у Камарынскай СШ. Лепшым гульцом названы Сяргей Пацега («Дублін»).
Як адзначыў старшы інспектар райвыканкама Юрый Крываручка, традыцыйна на футбольным полі ў гэты дзень збіраюцца моцныя каманды з усяго раёна. 2024 год не стаў выключэннем: гульня была цікавая і захапляльная.
Самыя цікавыя і важныя навіны шукайце ў нашых сацыяльных сетках: TikTok, Instagram, VK, Одноклассники, Telegram, Facebook, Youtube.
