Апошні вясенні месяц багаты на святы, якія ўмацоўваюць грамадзянскае адзінства і падкрэсліваюць важнасць захавання традыцыйных каштоўнасцей, маральных ідэалаў, сувязі пакаленняў. На змену ўрачыстасцям у гонар Вялікай Перамогі, галоўных сімвалаў краіны прыйшоў Дзень сям’і, які мы сустракаем з такімі ж светлымі, радаснымі пачуццямі. І які, напэўна, у кожнага з нас у першую чаргу асацыіруецца з самымі дарагімі і блізкімі людзьмі. А гэта значыць утульным домам, любоўю і клопатам, разуменнем і падтрымкай.
Сям’я Наталлі і Дзмітрыя Шапавалаў нарадзілася ў 2011 годзе, і ўжо па цеплыні, гармоніі іх узаемаадносін можна меркаваць: саюз шчаслівы. Яна – кіраўнік справамі Малейкаўскага сельвыканкама, ён – ляснік Петрыцкага лясніцтва. Сваёй прыстойнасцю і шчырасцю, адказным і гаспадарскім падыходам да любой справы, за якую бяруцца, заслужылі павагу і калег, і землякоў.
Абое, дарэчы, ураджэнцы Лоеўскага раёна, выпускнікі адной школы. А на Брагіншчыну прывяла працоўная дзейнасць.
Менавіта тут, у Малейках, калі Наталля была яшчэ ў статусе маладога спецыяліста, сямейнай пары выдзелілі дом. І з цягам часу сумненні: вясковае жыццё ці гарадское, зніклі. Першае – бліжэй. Тым больш што самі выраслі ў сельскай мясцовасці. Дваіх ахапіла і яшчэ больш аб’яднала вялікае жаданне ствараць вакол сябе ўтульнасць і прыгажосць.
Шырокі прастор для фантазіі і ўвасаблення творчых задум дае прысядзібны ўчастак. Яго, дарэчы, дбайныя, руплівыя гаспадары не проста выкарысталі для вырошчвання гародніны і садавіны, а максімальна акультурылі. У прыярытэце – ідэальная чысціня і парадак, зручнасць і камфорт, імкненне да дасканаласці. У гэтым бачаць залог сямейнага дабрабыту, знаходзяць задавальненне і асалоду для душы.
Дзмітрый, як толькі засяліліся ў дом, захапіўся сталярствам. Усе драўляныя канструкцыі і збудаванні на падворку – справа яго рук. Тут і прасторная альтанка з шыкоўнымі сталом і лавамі, і раскошная падвясная арэля, на якой могуць размясціцца адразу некалькі чалавек. Сакрэты і таямніцы працы з дрэвам мужчына спасцігае як майстар-самавучка. Ён ўпэўнены: ніякі іншы матэрыял не можа параўнацца з гэтым па цеплыні, падатлівасці і экалагічнасці. А Наталля побач з мужам з задавальненнем займаецца кветкамі, зялёнымі насаджэннямі. Разам абмяркоўваюць, што на зямельным участку патрэбна яшчэ змяніць, удасканаліць ці дадаць.
Дзякуючы такому працавітаму сямейнаму тандэму прыдамавая тэрыторыя радуе вока сваёй дагледжанасцю, эстэтычным афармленнем, з кожным годам набывае ўсё большую выразнасць. У 2022-м, дарэчы, атрымана перамога ў раённым конкурсе «Сядзіба ўзорнага парадку».
Два сонечныя праменьчыкі Наталлі і Дзмітрыя, іх шчасце, гонар і сэнс жыцця – дзеці. Дзесяцігадовы Ілля адказны і старанны ў вучобе, захапляецца легаканструяваннем, марыць стаць інжынерам. А яго сястрычцы Аляксандры бліжэй творчасць і мастацтва. Восенню яна пойдзе ў першы клас.
У выхаванні, дарэчы, бацькі прытрымліваюцца пазіцыі: лепшы сродак уздзеяння – уласны прыклад. А ў спрэчных пытаннях, па іх меркаванні, вельмі важна ўмець выслухаць адзін аднаго, зразумець і знайсці кампраміс, не дазволіць разгарэцца канфліктам. Такая жыццёвая мудрасць, відаць, і дапамагае захоўваць адзінства ў сям’і, накіроўваць дзяцей на правільную дарогу. Іх выбару, калі вырастуць, Наталля і Дзмітрый пярэчыць не будуць, бо лічаць: для чалавека важна рэалізоўваць сябе там, дзе ён адчувае найбольшую ўпэўненасць у сваіх сілах, здольнасцях і магчымасцях. Справа, якой займаешся, павінна быць па душы. А якасці і ўчынкі – высакародныя.
Валянціна БЕЛЬЧАНКА
Самыя цікавыя і важныя навіны шукайце ў нашых сацыяльных сетках: TikTok, Instagram, VK, Одноклассники, Telegram, Facebook, Youtube.
