Кастрыкін Уладзімір Міхайлавіч – камандзір аддзялення 239-га палка 76-й гвардзейскай стралковай дывізіі 61-й арміі Цэнтральнага фронту, гвардыі малодшы сяржант.
Нарадзіўся ў 1918 годзе ў вёсцы Кутлі (цяпер – Пічаеўскі раён Тамбоўскай вобласці) у сялянскай сям’і. Рускі. Пасля заканчэння няпоўнай сярэдняй школы працаваў у калгасе на радзіме.
У Чырвоную армію юнака прызвалі ў 1938 годзе. Са студзеня 1942-га – на франтах Вялікай Айчыннай вайны. Да верасня 1943-га камандаваў аддзяленнем 239-га гвардзейскага стралковага палка. Вызначыўся падчас бітвы за Днепр.
Так, у ноч на 28 верасня 1943 года пад шквальным агнём праціўніка гвардыі малодшы сяржант Кастрыкін у ліку першых пераправіўся праз раку ў раёне вёскі Асарэвічы і прыняў актыўны ўдзел у баях за захоп і ўтрыманне плацдарма на заходнім беразе. Асабіста знішчыў з кулямёта некалькі варожых агнявых варожых кропак, чым забяспечыў пераправу даверанага яму падраздзялення. А потым разам са сваімі байцамі прыкрываў пераправу іншых падраздзяленняў палка.
Загінуў абаронца ў баі 6 кастрычніка 1943 года.
Указам Прэзідыума Вярхоўнага Савета СССР ад 15 студзеня 1944 года Уладзіміру Кастрыкіну пасмяротна прысвоена званне Героя Савецкага Саюза – за ўзорнае выкананне баявых заданняў камандавання на фронце барацьбы з нямецкімі захопнікамі і праяўленыя пры гэтым мужнасць і гераізм. Пахаваны ён у брацкай магіле ў Галках.
Валянціна БЕЛЬЧАНКА
*У Вялікую Айчынную вайну верасень 1943-га стаў гістарычным для ўсёй Беларусі. Менавіта ў гэтым месяцы, задоўга да пачатку легендарнай аперацыі “Баграціён”, пачалося вызваленне нашай краіны ад нямецка-фашысцкіх захопнікаў. Шлях крывавы, неймаверна цяжкі, усланы вялікай колькасцю загінуўшых. Толькі ў брацкай магіле Камарына, які першым скінуў з сябе цяжар гітлераўскай акупацыі, пахавана больш чым 900 савецкіх воінаў. У тым ліку пяць Герояў Савецкага Саюза. А ўсяго за подзвігі, праяўленыя пры вызваленні Камарынскага і Брагінскага раёнаў, гэтага высокага звання ўдастоены 398 воінаў. Не ўсім суджана было сустрэць Перамогу. Імёны тых, хто аддаў за яё жыццё, – на пастаментах. Расказаць пра іх гераізм і мужнасць ставіць на мэце наш цыкл публікацый. Будзем ведаць і памятаць!
Самыя цікавыя і важныя навіны шукайце ў нашых сацыяльных сетках: TikTok, Instagram, VK, Одноклассники, Telegram, Facebook, Youtube.
