Высокапрадукцыйны сушыльны комплекс ЗСК-40 з’явіўся ў ААТ “Камарынскі” ў 2016-м. Абслугоўваць яго даручылі Уладзіміру Трэбку і Мікалаю Даўжанку. Мясцовыя спецыялісты адразу ацанілі тэхнічныя характарыстыкі сушыльнай гаспадаркі і вывучылі прынцып работы. Аказалася, нічога складанага тут няма. На такіх комплексах Уладзімір Уладзіміравіч ужо працаваў у сябе на малой радзіме (ён родам з Украіны).
У “Камарынскім” спачатку перапрацоўваў збажыну ў Кіраве на простай сушылцы, а калі наладчыкі вядучага прадпрыемства “Амкадор” зманціравалі ЗСК-40 Ш, перайшоў сюды. Апошнія два гады яго напарнікам з’яўляецца Руслан Куцэнка. Старшыня райкама прафсаюза работнікаў АПК Валянціна Дзегцярэнка і галоўны спецыяліст упраўлення сельскай гаспадаркі і харчавання Ала Гардзейчык павіншавалі іх з высокімі працоўнымі дасягненнямі, уручылі лісты з падзякай і падарункі. На 17 жніўня ў іх найлепшы вынік работы сярод аператараў сушыльных комплексаў.
За сумленную працу ў пятніцу, 14 жніўня, былі адзначаны чатыры экіпажы і два вадзіцелі “Камарынскага”. У іх ліку – старшы камбайнер Віталій Сафіенка. Сёлета ён убіраў каласавыя на новым КЗС-1218, якое адкрытае акцыянернае таварыства набыло ў лізінг. Для Віталія Пятровіча гэтае жніво – чатырнаццатае. Намалаціў ён 1233 тоны.
З 1989 года шчыруе на хлебнай ніве Іван Давідзенка. Спачатку ў яго была СК-5 “Ніва”, потым – “Дон-1500”, і вось ужо дзесяць гадоў ён жне і малоціць на камбайне “Гомсельмаша”. Вынік яго плённай працы – 1366 тон. Амаль столькі ж зерня і на рахунку Аляксандра Мішчанкі. Ён праславіўся як вопытны майстар хлебнай нівы сярод маладых камбайнераў Гомельшчыны, не раз быў у ліку лідараў. У 2016-м з паказчыкам 2032,6 тоны заняў другое месца на п’едэстале гонару.
Тысячны рубеж па намалоце зерня перасягнуў вопытны механізатар Сяргей Пархамец. За шматгадовую добрасумленную працу ён узнагароджаны Ганаровай граматай камітэта па сельскай гаспадарцы і харчаванні Гомельскага абласнога выканаўчага камітэта. Сяргей Паўлавіч дабіваецца добрых вынікаў не толькі на хлебным полі, але і на кармавым: займае прызавыя месцы сярод тых, хто рыхтуе зялёную масу.
Што датычыць вадзіцеляў, то і сёлета яны пацвердзілі сваё майстэрства. Аляксандр Музыкін перавёз 2567 тон зерня, Валянцін Бельчанка – 2416. У лік тысячнікаў трапіў і Міхаіл Яўсеенка (1070 тон).
З галоўным эканамістам “Камарынскага” Наталляй Анапрэенкай аналізуем паказчыкі ўраджайнасці зерневых і зернебабовых культур за апошнія гады. Найвышэйшы валавы збор ААТ атрымала ў 2016-м: 8170 тон у бункернай вазе, з кожнага гектара – па 31,9 цнт/га. Улічваючы розную ўрадлівасць зямель у сельгаспрадпрыемствах Брагіншчыны, неабходна прыняць пад увагу такі паказчык як ураджайнасць з бала-гектара. У сярэднім па раёне было атрымана па 135 кг зерня, у “Камарынскім” – па 176 кг. У раённым спаборніцтве сельгаспрадпрыемства прызналі лепшым. Дасягнутыя поспехі адзначылі і на абласным узроўні, выдзелілі новы трактар айчыннай вытворчасці, які перадалі ў рукі Віталя Сафіенкі. Дарэчы, новенькі “Беларус” камарынцы атрымалі і ў 2017-м, эксплуатуе яго Уладзімір Якімовіч.
Сёлета па падліках спецыяліста намалацілі 7817 тон зерня, у разліку на бала-гектар – па 146 кг. І ўраджай рапсу ў ААТ атрымліваюць не горшы, чым у іншых. У валавым зборы насення каштоўнай бялковай культуры, які атрымалі гаспадаркі раёна, іх уклад – найбольшы.
У папярэднія гады камарынцы пачыналі жніво раней за іншых, таму ў першыя дні ўборачнай кампаніі на раённай Дошцы гонару значыліся ў асноўным прозвішчы камбайнераў і вадзіцеляў гэтага ААТ. Потым іх змянялі прадстаўнікі суседніх гаспадарак. Сёлета важная кампанія складвалася па-іншаму. Дажынкі ААТ “Камарынскі” адзначыла ў ліку апошніх, што не перашкодзіла вопытным майстрам сваёй справы паказаць добрыя вынікі, высокую арганізаванасць, парадавацца ўраджаю, а яшчэ – папоўніць лік тысячнікаў.
Ніна СІНІЛАВА
Фота Вольгі ПАЛЯШЧУК
