Шчаслівымі ўладальнікамі квадратных метраў камерцыйнага жылля сталі маладыя спецыялісты, якія пачалі свой працоўны шлях у населеных пунктах Брагінскага раёна з узроўнем радыеактыўнага забруджвання звыш 5 кюры/км².
Запаветныя ключы навасельцам уручылі начальнік і галоўны спецыяліст аддзела жылёва-камунальнай гаспадаркі, архітэктуры і будаўніцтва райвыканкама Сяргей Прыходзька і Ірына Рыжык. Але спачатку сярод прэтэндэнтаў на новае жыллё прайшла жараб’ёўка, падчас якой кожны выцягваў паперку з нумарам сваёй будучай кватэры.
Затым усе накіраваліся па вышэйназваным адрасе. Як паведаміў Сяргей Іванавіч, у новым доме – 24 кватэры, тры з якіх, двухпакаёвыя, – для маладых сем’яў.
Так, у ліку шчаслівых навасельцаў – сям’я Марчанкаў . Сяргей з 2016 года працуе аграномам у ААТ “Пераможнік”. У гэтае сельгаспрадпрыемства ён быў накіраваны пасля заканчэння Палескага дзяржаўнага аграрнага каледжа ў 2016 годзе. Сёння разам з жонкай Аленай выхоўваюць сына Яўгена, якому ўжо споўнілася 9 месяцаў.
Да нядаўняга часу маладая сям’я жыла разам з бацькамі. І зараз жыллёвае пытанне для іх вырашана – прасторная кватэра спадабалася ўсім.
Дом пабудаваны за кошт сродкаў, выдзеленых на пераадоленне наступстваў чарнобыльскай катастрофы.
