Праект саюза моладзі накіраваны на аказанне падтрымкі мнагадзетным і няпоўным сем’ям, дзіцячым інтэрнатным установам, тым, хто трапіў у складаную жыццёвую сітуацыю і зведвае цяжкасці пры падрыхтоўцы да навучальнага года.
Добрыя справы заўсёды вяртаюцца да тых, хто іх робіць. У гэтым упэўнена і Галіна Каменская з Мазыра. Індывідуальны прадпрымальнік кожную пятніцу гандлюе на рынку Брагіна. А дапамагае ёй Маша – дзяўчынка з прыёмнай сям’і брата жанчыны.
– Для мяне дабрачыннасць – гэта вельмі патрэбная і важная справа, якой я займаюся ўжо шмат гадоў, – гаворыць Галіна Адамаўна. – Імкнуся дзяліцца з людзьмі ўсім, што ў мяне ёсць: рэчамі, прадуктамі, грашамі…
Індывідуальны прадпрымальнік заўсёды ўдзельнічае ў дабрачынных мерапрыемствах ГА “БРСМ”. І сёлета напярэдадні новага навучальнага года яна перадала юным жыхарам раёна 10 ранцаў, сумкі для зменнага абутку і адзенне.
Удзел у дабрачыннай акцыі “У школу – з добрым сэрцам” прынялі і супрацоўнікі Брагінскага вузла электрасувязі. Новы ранец і ўсе небходныя канцылярскія прыналежнасці яны ўручылі Паліне Козел.
Дарэчы, у дзяўчынкі ёсць сястрычка-блізнятка Аліна. Будучыя першакласніцы плануюць сядзець за адной партай, таму сімвалічна, што і падарункі да школы яны атрымалі адначасова: Аліне рукзак перадала лідар прафсаюзнага руху сістэмы аховы здароўя Алена Любенка ад імя раённага аб’яднання прафсаюзаў.
Па словах Алены Мікалаеўны, медработнікі набылі два наборы для першакласнікаў. Яшчэ адзін яны ўручылі Кірылу Ярмоленку з Кавакі.
У рамках акцыі “У школу – з добрым сэрцам” ГА БРСМ рукзак з сшыткамі, алоўкамі і іншымі патрэбнымі рэчамі атрымаў і юны жыхар Камарына Іван Якімовіч. Яму падарунак уручылі супрацоўнікі пагранічнай службы.
У зборы канцылярскіх прыналежнасцяў саюзу моладзі дапамаглі таксама калектывы ветстанцыі, ААТ “Белаграпрамбанк” і ААТ “ААБ Беларусбанк”.
