Як трэба сябе паводзіць на возеры ці рацэ, заядлыя рыбакі ведаюць добра, праўда, выконваць правілы бяспекі імкнуцца не заўсёды. І каб нагадаць ім, што з вадой жартаваць не варта, рэгулярна праводзяцца прафілактычныя мерапрыемствы.
У чарговае патруляванне па Дняпры супрацоўнікі дзяржаўнай інспекцыі па маламерных судах МНС накіраваліся ў мінулую суботу. На гэты раз у склад рэйдавай групы ўвайшлі начальнік ДІМС Гомельскай вобласці Павел Новік, дзяржінспектар Гомельскага ўчастка Уладзімір Іваноў, дзяржінспектар Брагінскага ўчастка Мікалай Катлабай, а таксама начальнік пажарнай аварыйна-выратавальнай часці №2 г.п. Камарына Алег Пугач.
У гэтыя дні рыбакоў на рацэ не шмат. Гавораць, што рыба дрэнна клюе. Але ў поле зроку інспектараў усё ж трапляюць аматары такога віду адпачынку. І першае, на што звычайна звяртаецца ўвага ўдзельнікаў рэйду, – наяўнаць у іх выратавальных камізэлек. Калі лодка стаіць на якары, то дазваляецца гэты сродак бяспекі зняць, а вось падчас руху ён абавязкова павінен быць на чалавеку. На жаль, не ўсе прытрымліваюцца гэтага правіла. І як вынік – вынясенне пастановы аб адміністрацыйным правапарушэнні.
У размове з адпачывальнікамі дзяржінспектары не стамляюцца падкрэсліваць, што цаной любой нядбайнасці на вадзе можа стаць чалавечае жыццё. І галоўным у сваёй рабоце яны лічаць не пакараць, а растлумачыць важнасць выканання правілаў бяспекі, таму тым, хто “папаўся” ўпершыню, выпісваюць мінімальны штраф – 0,5 базавай велічыні. Аплаціць яго неабходна на працягу месяца. Калі ж гэтага не зрабіць, то да сумы ў 12,25 рубля аўтаматычна дадасца яшчэ дзве базавыя велічыні.
У рыбакоў удзельнікі воднага патруля таксама правяраюць рэгістрацыйныя дакументы на лодку, пасведчанне на права кіравання маламерным суднам, ці ёсць адзнака аб праходжанні тэхагляду. Калі ўсё ў парадку, яны жадаюць адпачывальнікам поспехаў і працягваюць свой шлях.
Што ж неабходна ведаць, накіроўваючыся на водную прагулку ці рыбалку? У першую чаргу маламернае судна павінна быць зарэгістравана ў ДІМС (выключэннем з’яўляюцца вяслярныя лодкі, байдаркі і надзіманыя суды грузападымальнасцю менш за 225 кілаграмаў). За парушэнне гэтага правіла прадугледжаны штраф ад 2 да 5 базавых велічынь (арт. 18.39 КаАП). Патрэбна таксама прайсці тэхагляд судна. Калі ж праігнараваць гэтую працэдуру, то ўладальніку можа пагражаць штраф да 3 базавых велічынь (ч. 1 арт. 18.8 КаАП).
А каб кіраваць лодкай з рухавіком магутнасцю больш за 5 конскіх сіл, неабходна атрымаць яшчэ і адпаведнае пасведчанне. У адваротным выпадку штрафу ад 5 да 10 базавых велічынь не пазбегнуць (ч. 3 арт. 18.8 КаАП). Не лішнім будзе таксама нагадаць, што за ўпраўленне маторнай лодкай у стане алкагольнага ап’янення прадугледжаны штраф ад 10 да 50 базавых велічынь з пазбаўленнем права кіравання маламенымі судамі на тры гады.
І, вядома ж, не варта забываць аб выратавальных камізэльках. Бо толькі выкананне ўсіх мер бяспекі на вадзе можа папярэдзіць бяду і не азмрочыць адпачынак.
Дарэчы, удзельнікамі воднага патруля ў мінулую суботу да адказнасці былі прыцягнуты чатыры чалавекі за ігнараванне выратавальных камізэлек падчас руху і адзін – за ўпраўленне маламерным суднам, не маючы на гэта права.
