День без аўтамабіля – сусветная акцыя, якая штогод 22 верасня праводзіцца ў многіх гарадах Беларусі. Сёлета да яе далучыўся і Брагін.
Прадстаўнікі раённай арганізацыі ГА “БРСМ” і аддзялення Дзяржаўтаінспекцыі РАУС разам выйшлі на вуліцы райцэнтра, каб прыцягнуць увагу жыхароў да праблем, якія нясе з сабой аўтатранспарт, і пытанняў забруджвання паветра. Вядома, што сучасны чалавек ніколі цалкам не адмовіцца ад аўтамабіля, але пакінуўшы яго ў гаражы нават на адзін дзень, ён унясе свой, хоць і невялікі, уклад у агульную справу.
Актывісты БРСМ нагадалі ўдзельнікам дарожнага руху, наколькі важна клапаціцца аб навакольным асяроддзі. Яны ўручалі вадзіцелям і пешаходам інфармацыйныя лістоўкі, дзе гаварылася аб мэтах і задачах мерапрыемства, прапаноўвалі пакінуць свой аўтамабіль на паркоўцы і прагуляцца пешшу па свежым паветры.
