Снегапады і маразы – сапраўднае выпрабаванне для птушак, а для нас з вамі самы час для клопату пра іх!
Грамадская арганізацыя «Ахова птушак Бацькаўшчыны» заклікае зрабіць гэта разам падчас акцыі «Птушкі ля кармушкі»: удзельнічайце 14-15 студзеня і не спыняйцеся ўсю зіму!
Мэта акцыі – нагадаць усім, як важна падкормліваць птушак у халады.
Чаму менавіта цяпер? Знайсці кормы пад снегам – няпростая задача, да таго ж узімку трэба больш энергіі на абаграванне, а значыць і ежы.
Як прыняць удзел у акцыі? 14 і/ці 15 студзеня палічыце віды і колькасць птушак на кармушцы і адпраўце даныя ў АПБ адным з гэтых спосабаў:
• запоўніце простую форму (адкрыецца 14 студзеня, будзе працаваць да 18.00 16 студзеня);
• напішыце паведамленне ў FB ці VК;
• напішыце паведамленне на info@ptushki.org.
У АПБ будуць рады вашым расказам, назіранням і ўражанням – расмяшчайце свае фатаграфіі ў сацыяльных сетках (FB ці VК, Instagram) з хэштэгам #птушкілякармушкі.
Фатаграфіі сваіх кармушак можна дадаваць у спецыяльныя альбомы ў FB і VK. За самыя цікавыя здымкі АПБ плануе раздаць сувеніры!
Калі кармушкі пакуль няма – не бяда. Як яе зрабіць самастойна і хутка? Адказы ў гэтым артыкуле АПБ.
Важна: у кармушках з тэтрапака не забудзьцеся прарабіць некалькі невялікіх адтулін у дне, каб вада ад дажджу і снягі не «затапіла» птушыную сталовую.
Чым падкарміць птушак?
Лепшы корм для вараб’інападобных — чорныя несалёныя і нежараныя семкі. Можна зрабіць сумесь – семкі сланечніка, проса і авёс.
Сініцы і дзятлы будуць рады несалёнаму свежаму салу (яго можна нанізаць на цвікі па краях кармушкі, падвесіць у сетцы, прывязаць да галінкі на дрэве), а вераб’і, зелянушкі, чыжы – несалёнаму нежаранаму арахісу.
Памятаеце: чым больш разнастайны птушыны пачастунак, тым больш відаў птушак можа прыляцець у вашу «сталовую».
ГА «Ахова птушак Бацькаўшчыны» заклікае далучацца да акцыі, бо колькі птушак не застануцца галоднымі гэтай зімой, залежыць ад кожнага з нас.
