За званне лепшых змагаліся 10 каманд з устаноў агульнай сярэдняй адукацыі раёна, дэманструючы волю да перамогі. Алімпійская сістэма правядзення спаборніцтваў дадавала рызыкі і не даравала памылак, бо кожнае паражэнне азначала вылет з турніру.
– Спаборніцтвы былі арганізаваны з мэтай папулярызацыі футбола сярод моладзі і выяўлення самых таленавітых гульцоў для фарміравання каманды, якая прадставіць Брагінскі раён на абласным узроўні, – адзначыў дырэктар фізкультурна-спартыўнага цэнтра дзяцей і моладзі Мікалай Шубянок.
У выніку ўпартай барацьбы на п’едэстал узняліся наймацнейшыя. Лідарамі сталі юныя футбалісты Камарынскай сярэдняй школы. Яны прадэманстравалі майстэрства і характар, абыграўшы ўсіх сваіх сапернікаў і заваяваўшы залатыя медалі першынства.
Другое месца, праявіўшы байцоўскія якасці, занялі юнакі з Брагінскай сярэдняй школы. Яны саступілі толькі пераможцам у фінальным матчы, іх гульня пакінула добрыя ўражанні.
Бронза дасталася вучням гімназіі г.п. Брагіна. Іх медалі – заслужаны вынік упартых трэніровак.
Юныя спартсмены прадэманстравалі камандны дух, павагу да сапернікаў і волю да перамогі. Можна смела казаць пра тое, што ў брагінскага футбола ёсць будучыня, і гэтыя хлопцы – яго надзея.
Самыя цікавыя і важныя навіны шукайце ў нашых сацыяльных сетках: TikTok, Instagram, VK, Одноклассники, Telegram, Facebook, Youtube.
