У гэтыя веснавыя дні прырода Палескага дзяржаўнага радыяцыйна-экалагічнага запаведніка абуджаецца.
А для яго работнікаў сакавік не толькі час цяпла і сонца, але і перыяд інтэнсіўнай падрыхтоўкі да Радаўніцы.
Такія клопаты на тэрыторыі, з якой адселены людзі ў выніку аварыі на Чарнобыльскай АЭС, набываюць асаблівае значэнне. Гэта не проста захаванне традыцый, а даніна памяці і павагі.
Праца работнікаў ПДРЭЗ напярэдадні Радаўніцы – карпатлівая і маштабная, бо ў цэнтры ўвагі знаходзяцца пытанні не толькі добраўпарадкавання, але і бяспекі. Асноўны фронт дзеянняў разгортваецца на могілках і помніках, якія раскіданы па ўсёй адселенай тэрыторыі.
Каб забяспечыць да іх свабодны доступ, патрэбна выкасіць траву, прыбраць сухое голле, леташняе лісце. Улічваючы, што многія такія месцы знаходзяцца ў густых зарасніках, догляд за імі патрабуе немалых намаганняў.
Не менш важна таксама спілаваць ці абрэзаць старыя дрэвы, якія могуць сваім падзеннем пашкодзіць помнікі, стварыць небяспеку для наведвальнікаў.
Яшчэ адзін напрамак – стварэнне і падтрыманне ў належным стане супрацьпажарных палос. Ранняй вясной, калі трава яшчэ сухая, рызыка ўзгаранняў асабліва высокая. Работнікі запаведніка пракладваюць палосы, якія служаць бар’ерам для распаўсюджвання агню, тым самым забяспечваючы бяспеку як наведвальнікаў, так і навакольнага асяроддзя.
Асаблівая ўвага надаецца помнікам Вялікай Айчыннай вайны і магілам воінаў-афганцам. Яны нагадваюць нам аб гераічных і трагічных старонках гісторыі. Да Радаўніцы іх чысцяць ад забруджванняў, фарбуюць, аднаўляюць надпісы, каб захаваць першапачатковы выгляд.
Варта адзначыць, што такая работа – не аднадзённая акцыя. За станам помнікаў і могілак супрацоўнікі запаведніка сочаць на працягу года, і гэта сведчанне таго, што нават у зоне, дзе не жывуць людзі, заўсёды ёсць месца для памяці, павагі і клопату.
Самыя цікавыя і важныя навіны шукайце ў нашых сацыяльных сетках: TikTok, Instagram, VK, Одноклассники, Telegram, Facebook, Youtube.
