Мэта іх візіту – збор інфармацыі для падрыхтоўкі фотавыставы і дакументальнага фільма, прысвечаных чарнобыльскай тэматыцы.
Філіп Гросман з’яўляецца аўтарам фотавыставы “Чарнобыль – трагедыя, урокі, надзея”, арганізаванай пры падтрымцы Беларусі ў красавіку гэтага года у Секратарыяце ААН у Нью-Ёрку. У нашым раёне фатографаў зацікавіла сонечная электрастанцыя ў Сабалях, якая стала прыкладам альтэрнатыўнага засваення забруджаных у выніку аварыі на ЧАЭС тэрыторый. Экалагічны аб’ект госці наведалі ў суправаджэнні намесніка старшыні райвыканкама Мікалая Яшчука і начальніка аддзела ідэалагічнай работы, культуры і па справах моладзі Ігара Самбука.
Каля помніка Васілю Ігнаценку ў Брагіне госці ўшанавалі памяць аб мужным пажарным. Потым яны наведалі гістарычны музей з карціннай галерэяй, дзе галоўны захавальнік фондаў Надзея Мялешка пазнаёміла з выставай “Пакінутая зямля” і інш. Шмат пачулі яны і аб праектах, якія рэалізуюцца ў раёне дзякуючы падтрымцы ПРААН і ГА “Беларускі зялёны крыж”.
Замежныя фатографы таксама падзяліліся ўражаннямі аб наведванні Беларусі. Яны былі прыемна здзіўлены, як беражліва мы захоўваем памяць аб трагедыі, пры гэтым паказваючы, што жыццё працягваецца. Вядома, наступствы яе – не толькі сацыяльна-эканамічныя, экалагічныя, але і духоўныя – адчуваюцца дагэтуль, але ж беларусы навучыліся жыць з гэтай праблемай і вераць у лепшую будучыню свайго краю.
