Нацыянальны банк Беларусі рэкамендуе беларусам спланаваць свае плацяжы на бліжэйшыя 2-3 дні і правесці іх сёння-заўтра. Аб гэтым заявіў начальнік галоўнага ўпраўлення плацежных сістэм і лічбавых тэхналогій Нацыянальнага банка Аляксандр Сотнікаў.
«Дэнамінацыя — нетрывіяльная падзея для краіны і банкаўскай супольнасці. Банкаўская інфраструктура — банкаматы, плацежныя тэрміналы, уласна інфраструктура, якая абслугоўвае карткі, напрыклад на АЗС, — гэта вялікі сегмент. Яго адаптацыя да новых умоў патрабуе часу. Таму вялікая просьба да ўсіх грамадзян нашай краіны: спланаваць свае плацяжы на бліжэйшыя два-тры дні, і ўсё, што яны хацелі аплаціць — мабільную сувязь, камунальныя плацяжы, лепш аплаціць сёння або заўтра ў першай палавіне дня», — падкрэсліў ён.
Паводле слоў Аляксандра Сотнікава, кліенты павінны арыентавацца ў першую чаргу на тую інфармацыю, якая будзе размешчана на афіцыйных сайтах банкаў.
«Розныя каналы абслугоўвання будуць адключацца і падключацца банкамі ў розны час. Напрыклад, інтэрнэт-банкінг у розных банках адключаецца ў сярэднім з сярэдзіны дня 30 чэрвеня, а да сярэдзіны дня 1 ліпеня ён будзе падключаны», — растлумачыў ён.
Гаворачы аб тых людзях, якія едуць за мяжу, прадстаўнік Нацбанка звярнуў увагу, што ў ноч з 30 чэрвеня на 1 ліпеня банкаўскія плацежныя карткі за мяжой таксама працаваць не будуць.
